Perception box

Perception box သည် သင့်ရဲ့လှုပ်ရှားမှုတွင် အဓိကကျသူများကို ကမ်ပိန်းမှတစ်ဆင့် ထိရောက်တဲ့သတင်းစကား ပေးနိုင်ဖို့အတွက် ဘာတွေလုပ်ဆောင်ရမလဲဆိုတာကို နားလည်သိရှိအောင် ပြုလုပ်တဲ့လေ့ကျင့်ခန်းတစ်ခုဖြစ်ပါသည်။ မိမိရဲ့လှုပ်ရှားမှုကို ထောက်ခံသူတွေကို ထဲထဲဝင်ဝင်ပါဝင်လာအောင် ဘယ်လိုစည်းရုံးမလဲဆိုတာကိုလဲ နားလည်အောင်ပြုလုပ်ပေးသည့် လေ့ကျင့်ခန်းတစ်ခုဖြစ်ပါသည်။ Spectrum of allies ကိုလေ့လာပါ။

Perception Box တွင် အကွက်လေးကွက်ပါရှိပါသည်။ ပထမအကွက်ဖြစ်တဲ့ “Us on Us” မှာ သင့်လှုပ်ရှားမှုနဲ့ပတ်သက်ပြီး၊ သင်နဲ့ပတ်သက်ပြီး အရေးအကြီးဆုံးအရာတွေကို ချရေးရမှာဖြစ်ပါသည်။ သင်ကဘယ်သူလဲ၊ သင်ဘာတွေကိုလိုချင်လဲ၊ သင်ဘာကြောင့်ဒီအရာတွေကိုလိုချင်လဲ စတဲ့မေးခွန်းတွေကို မေးပြီး ဖြေကြည့်ရမှာဖြစ်ပါသည်။ ဒုတိယအကွက် “Us on Them” မှာတော့ သင့်ရဲ့လှုပ်ရှားမှုမှာ အဓိကကျသူတွေကို သင်ဘယ်လိုမြင်လဲဆိုတာကို စဉ်းစားပြီး ချရေးရမှာဖြစ်ပါသည်။

သင့်အနေနဲ့ လှုပ်ရှားမှုတွင်ပါဝင်တဲ့ အခြားသူတွေ ဘယ်လိုခံစားနေရလဲဆိုတာကို မြင်ယောင်ကြည့်ပြီး သူတို့နဲ့ပတ်သက်တဲ့ အချက်အလက်တွေကို ရနိုင်သလောက် စုဆောင်းပြီး သင့်ရဲ့ထင်မြင်ချက်တွေကို ချရေးရမှာဖြစ်ပါသည်။

တတိယအကွက် “Them on Us” မှာတော့ သင့်ရဲ့လှုပ်ရှားမှုတွင် အဓိကကျသူများက သင့်အပေါ်ဘယ်လိုမြင်လဲဆိုတာကို စဉ်းစားပြီး ချရေးရမှာဖြစ်ပါသည်။ အချို့လူများ သင့်အပေါ် အထင်အမြင်လွဲမှားမှုများရှိနိုင်တယ်ဆိုရင် ဒီနေရာမှာထည့်ရေးသင့်ပါသည်။ သင့်လှုပ်ရှားမူတွေင် မပါဝင်သေးသည့် ကြားနေများ၊ အတိုက်အခံများ၊ ထောက်ခံသူများ သင့်အပေါ်မှာ ထားရှိနိုင်မယ့် စိတ်နေသဘောထားများကို စဉ်းစားပြီး ချရေးရမှာဖြစ်ပါသည်။ လှုပ်ရှားမှုတွင် အနည်းငယ်သာ ထောက်ခံသူများအကြောင်းစဉ်းစားသည့်အခါ သူတို့ အမာခံမဟာမိတ်များ ဖြစ်မလာရသေးတဲ့အကြောင်းအရင်းကိုပါ ထည့်သွင်း စဉ်းစားပြီးရေးသင့်ပါသည်။

စတုတ္ထအကွက်နဲ့ နောက်ဆုံးအကွက်ဖြစ်တဲ့ “Them on Them” မှာတော့ လှုပ်ရှားမှုမှာ အဓိကကျသူတွေ သူတို့ကိုယ်သူတို့ ဘယ်လိုမြင်လဲဆိုတာကို စဉ်းစားပြီးချရေးရမှာ ဖြစ်ပါသည်။ ဥပမာအနေဖြင့် သင့်ရဲ့လှုပ်ရှားမှုကို ထောက်ခံသူတွေ ဘာအကြောင်းကြောင့် ထောက်ခံနေကြတာလဲ၊ အတိုက်အခံတွေကလဲ ဘာအကြောင်းကြောင့် အတိုက်အခံလုပ်နေကြတာလဲ စတာတို့ကို သေချာစဉ်းစားဖို့လိုပါသည်။ ကြားနေသူများနဲ့ပတ်သက်ပြီး သူတို့ဘာကြောင့် လှုပ်ရှားမှုမှာမပါဘဲ ကြားနေအဖြစ်သာ ဆက်လက်ရပ်တည်နေလဲဆိုတာကို စဉ်းစားရန်လိုအပ်ပါသည်။ သင့်ရဲ့လှုပ်ရှားမှုအကြောင်းကို သူတို့သေချာနားမလည်လို့လား ဒါမှမဟုတ် စိတ်မဝင်စားတာလားဆိုတာကို နားလည်အောင်လုပ်ဖို့လိုပါသည်။ အနည်းငယ် မထောက်ခံသူများနဲ့ အမာခံအတိုက်အခံများ သင့်ရဲ့လှုပ်ရှားမှုကို ဘာလို့အကောင်းမမြင်တာလဲဆိုတာကို နားလည်အောင် ပြုလုပ်ရမှာဖြစ်ပါသည်။ အနည်းငယ်ထောက်ခံသူများအနေနဲ့ သူတို့ဘာလို့ အမာခံမဟာမိတ်များ ဖြစ်မလာသေးလဲဆိုတာကို နားလည်အောင် လုပ်ဖို့လိုပါသည်။

လှုပ်ရှားမှုအတွက် workshop နဲ့ မဟာဗျူဟာရေးဆွဲသည့် အစီအစဉ်များတွင် Perception box တွင်ပါရှိသည့် အကွက် (၄) ကွက်ကို ရိုးရိုးရှင်းရှင်းနဲ့ လွယ်လွယ်ကူကူ ဖြည့်နိုင်အောင် လှုပ်ရှားမှုတွင် ပါဝင်ပတ်သက်သူတွေ ဘယ်လိုခံစားနေရလဲဆိုတာကို သင့်အနေနဲ့ သေချာနားလည်သဘောပေါက်အောင်လုပ်ဖို့လိုပါသည်။ Perception Box ကို ပြည့်ပြည့်စုံစုံဖြည့်နိုင်အောင် လှုပ်ရှားမှုတွင် ပါဝင်သူများကို မေးခွန်းများမေးခြင်း၊ သူတို့သဘောထားဆန္ဒများကိုစစ်တမ်းကောက်ခြင်း၊ အဖွဲ့အလိုက် ဆွေးနွေးခြင်းများလုပ်ပြီး သူတို့အကြံဉာဏ်တွေကိုတောင်းခြင်း စသည်တို့ကို ပြုလုပ်သင့်ပါသည်။

အကွက် (၄) ကွက်လုံး ဖြည့်ပြီးသည့်အခါတွင် ဖြည့်ထားသည့် အချက်အလက်များကို ကိုးကားပြီး မိမိရဲ့လှုပ်ရှားမှုမှာ အဓိကကျသူ အားလုံး မိမိဖြေရှင်းချင်တဲ့ ပြဿနာကို ဘယ်လိုနားလည်သဘောပေါက်လဲဆိုတာကို သိရှိနိုင်မှာဖြစ်ပါသည်။ ဒီလိုလုပ်ခြင်းဖြင့် အဓိကကျသူတွေ သင့်ရဲ့လှုပ်ရှားမှုကို ထဲထဲဝင်ဝင် ပါဝင်လာအောင် စည်းရုံးနိုင်မည့် ကမ်ပိန်းသတင်းစကားကို ဖန်တီးပြီး ဖြန့်ဝေနိုင်မှာ ဖြစ်ပါသည်။

Perception box သည် မိမိလှုပ်ရှားမှုမှာ အဓိကကျသူတွေကို ကမ်ပိန်းမှတစ်ဆင့် သတင်းစကားပေးရာတွင် ထိထိရောက်ရောက်ပေးနိုင်အောင် အကူအညီပေးပါသည်။ သတင်းစကားမှာလဲ အရေးကြီးတဲ့ အပိုင်း (၂) ပိုင်းပါဝင်ရမည် ဖြစ်ပါသည်။

• သတင်းစကားရဲ့ ပထမပိုင်းတွင် “Them on them” အကွက်ကို အသုံးပြုပြီး ကမ်ပိန်းမှတစ်ဆင့် ဖြေရှင်းချင်တဲ့ ပြဿနာကို ပေါ်လွင်အောင် ရေးရမှာဖြစ်ပါသည်။ ဒီနေရာတွင် “Us on them” အကွက်ကို မသုံးဘဲထားထားရပါမည်။

• ဒုတိယပိုင်းမှာတော့ မိမိကမ်ပိန်းမှတစ်ဆင့် လှုပ်ရှားမှုတွင် အဓိကကျသူများကို သင့်ရဲ့အဆိုပြုချက်ပေးရမှာဖြစ်ပါသည်။ ဒီနေရာတွင် “Us on Us” အကွက်ကို အသုံးပြုပြီး ရှိနိုင်သည့်အထင်လွဲမှားမှုများကို တိုက်ဖျက်ရန် “Them on Us” အကွက်ကို အသုံးပြုရမည်ဖြစ်သည်။

ဥပမာအနေနဲ့ မိမိဦးဆောင်သောကမ်ပိန်းသည် ရဲများက ပြည်သူများကို မတရားအကြမ်းဖက်နေမှုများကို တိုက်ဖျက်သည့် လှုပ်ရှားမှုတစ်ခုဆိုပါက မိမိသတင်းစကားရဲ့ ပထမပိုင်းမှာ မိမိဖြေရှင်းချင်တဲ့ပြဿနာကို အရင်နားလည်အောင်ရှင်းပြဖို့လိုပါသည်။ လက်ရှိရင်ဆိုင်နေရတဲ့ ပြဿနာသည် လူ့အခွင့်အရေးချိုးဖောက်ခံရသည့် ပြဿနာမဟုတ်ပါ။ ရဲတပ်ဖွဲ့ဝင်များက သူတို့ကိုအပ်နှင်းထားတဲ့ လုပ်ပိုင်ခွင့်များနှင့်အာဏာကို အလွဲသုံးစားလုပ်တဲ့ ပြဿနာဖြစ်သည်။ ရဲတပ်ဖွဲ့ဝင်များသည် ဒုစရိုက်မှုကို နှိမ်နင်းဖို့ရည်ရွယ်ချက်ဖြင့် ရဲတပ်ဖွဲ့ဝင်များ ဖြစ်လာကြသော်လည်း လက်ရှိအခြေအနေတွင် အပြစ်မရှိသော ပြည်သူများကို အကြမ်းဖက်နှိမ်နင်းနေတယ်ဆိုတာကို ထောက်ပြဖို့အတွက်ဖြစ်သည်။

သတင်းစကားရဲ့ဒုတိယပိုင်းတွင် အပြစ်မဲ့ပြည်သူများကို အကြမ်းဖက်ဖြိုခွင်းတာမလုပ်ရန် ရဲတပ်ဖွဲ့ဝင်များကို စည်းရုံးလှုံ့ဆော်ရမည်ဖြစ်သည်။ ဒီလိုလုပ်နိုင်ဖို့အတွက် မိမိလှုပ်ရှားမှုတွင် ပါဝင်နေသူအားလုံးသည် ငြိမ်းချမ်းစွာဆန္ဒပြသူတွေဖြစ်တယ်ဆိုတာကို ပေါ်လွင်အောင် ပြောဆိုရမည်ဖြစ်သည်။